వర్ధన్నపేట జనవరి 21 (జర్నలిస్ట్ వార్త): ద్విచక్ర వాహనదారులు తప్పనిసరిగా హెల్మెట్ ధరించి ప్రయాణించాలని, ఇది మీ ప్రాణాలకు రక్షణ కవచమని వర్ధన్నపేట ఎస్ఐ సాయిబాబు పేర్కొన్నారు. తెలంగాణ పోలీస్ శాఖ ఆదేశాల మేరకు నిర్వహిస్తున్న రోడ్డు భద్రతా అవగాహన కార్యక్రమంలో భాగంగా ఆయన ప్రజలకు పలు సూచనలు చేశారు.ఈ సందర్భంగా ఎస్ఐ సాయిబాబా మాట్లాడుతూ.. రోడ్డు ప్రమాదాల్లో తలకు గాయాలు కావడం వల్లే అత్యధికంగా మరణాలు సంభవిస్తున్నాయని ఆవేదన వ్యక్తం చేశారు. కేవలం జరిమానాల నుంచి తప్పించుకోవడానికి కాకుండా, ప్రతి ఒక్కరూ తమ ప్రాణాల రక్షణ కోసం హెల్మెట్ను ఒక బాధ్యతగా ధరించాలని కోరారు. "హెల్మెట్ మీ రక్షణ కవచం" అనే నినాదంతో పోలీసులు రూపొందించిన పోస్టర్లను ఆయన ఈ సందర్భంగా ప్రదర్శించారు.
ఈ సందర్భంగా పోలీసులు సూచించిన హెల్మెట్ను బరువుగా అనుకోవద్దు: హెల్మెట్ను భారంలా చూడకుండా, మీ ప్రాణ భద్రతకు ఇచ్చే ప్రాధాన్యతగా గుర్తించాలి.దూరంతో సంబంధం లేదు: కొద్దిపాటి దూరమైనా సరే, వాహనంపై వెళ్లేటప్పుడు తప్పనిసరిగా హెల్మెట్ వాడాలి.పిల్లల భద్రత కూడా ముఖ్యం: వాహనంపై వెళ్లేటప్పుడు మీతో పాటు ప్రయాణించే పిల్లలకు కూడా రక్షణ అవసరమని గుర్తించాలి. ట్రాఫిక్ నిబంధనలు పాటించండి: రోడ్డు నిబంధనలను అతిక్రమించకుండా జాగ్రత్తగా డ్రైవ్ చేయడం ద్వారా ప్రమాదాల బారి నుంచి మిమ్మల్ని మీరు కాపాడుకోవచ్చు.ప్రతి వాహనదారుడు పోలీసుల సూచనలను పాటించి, సురక్షితమైన ప్రయాణాన్ని సాగించాలని, ప్రమాద రహిత సమాజం కోసం ప్రతి ఒక్కరూ సహకరించాలని ఎస్ఐ సాయిబాబు పిలుపునిచ్చారు.
